नेपाल विद्युत् प्राधिकरणले बाढी प्रभावित क्षेत्रमा केन्द्रीय लाइन पुर्‍याएको छ । बाग्लुङको बडिगाड गाउँपालिका–१० मा बाढीले लघुजलविद्युत् बगाउँदा एक महिनादेखि अन्धकारमा बस्दै आएका स्थानीय बासिन्दाको सहजताका लागि केन्द्रीय लाइन पुर्‍याएको हो ।

गएको साउन २२ गते आएको बाढीले क्षति पुर्‍याएको बडिगाड –१० दर्लिङ, निगलपानीलगायत क्षेत्रमा केन्द्रीय विद्युत् पुर्‍याएको विद्युत् प्राधिकरणका कार्यालय प्रमुख इन्जिनियर पवन पौडेलले जानकारी दिनुभयो । यस क्षेत्रमा पहिले लघुजलविद्युत् आयोजनाबाट विद्युत् प्रयोग गर्दै आएकामा बाढीले पूर्णरूपमा बगाएपछि सयौं घरपरिवार अन्धकारमा थिए ।

यस्तै बाढीले क्षति पुर्‍याएको गुल्मीको मुसिकोट, मालिका गाउँपालिका हुँदै दर्लिङमा पनि लाइन जोडिएको प्रमुख पौडेलको भनाइ छ ।

—