समाचार

प्रधानमन्त्री देउवा आँफै संसदप्रति जवाफदेही नभएको एमाले सांसद अधिकारीको आरोप

प्रमुख प्रतिपक्ष दल नेकपा (एमाले)का सांसद खगराज अधिकारीले प्रधानमन्त्री शेरबहादुर देउवा आँफै संसदप्रति जवाफदेही नभएको आरोप लगाएका छन् । पूर्वगृहमन्त्री समेत रहेका सांसद अधिकारीले महिनाको २ पटक प्रतिनिधिसभामा उपस्थित भएर एक घण्टाको प्रश्नोत्तर कार्यक्रममा भाग लिने नियमावली भएपनि प्रधानमन्त्री देउवा सो कार्यक्रममा एकपटक पनि सहभागी नभएको उल्लेख गर्दै आपत्ति समेत जनाएका छन् ।

उनले सत्तापक्ष र सरकार संसदप्रति जवाफदेही नभएकाले महिलाहरुको समानुपातिक समावेशी प्रतिनिधित्वको सवाल पनि ओझेलमा परेको दाबी गरे । मंगलबार आगामी प्रदेशसभा र संघीय संसदको निर्वाचनमा महिलाको समानुपातिक सहभागिता गराउन संसदमा पेश गरिएको जरुरी सार्वजनिक महत्वको प्रस्तावमाथिको छलफलमा भाग लिँदै सांसद अधिकारीले आफ्नो पार्टी राज्यका हरेक निकायमा महिलाहरुको समानुपातिक प्रतिनिधित्व सुनिश्चित गराउन निरन्तर लागिरहेको बताए ।

उनले भने, ‘प्रतिनिधिसभा नियमावलीको परिच्छेद ९ मा महिनाको दुई पटक प्रत्यक्ष प्रधानमन्त्री संसदमा उपस्थित भएर प्रश्नोत्तर कार्यक्रम गर्नुपर्ने एक घण्टाको समय छ । संसदप्रति सरकार, सत्तापक्षनै जवाफदेही छँदै छैन सभामुख महोदय । अनि अहिले हामीले अरन्यरोदन गरेर के हुन्छ ? सत्तापक्ष नै स्वमय तयार छैन ।’

उनले थपे, ‘अहिलेसम्म सम्माननीय प्रधानमन्त्री शेरबहादुर देउवा प्रधानमन्त्री भएदेखि यो कार्यक्रम सुरु भयो ? उनहरु जवाफदेही हुनुहुन्छ । त्यसकारण हामीले यो महत्वपूर्ण छलफल त गरेका छौं । यसको सम्मान त हामी गर्छौं । तर यो कार्यान्वयन हुन्छ ? कार्यान्वयन हुनेगरी ल्याइएको छ ? अहिले त कानून बन्ने, बनाउने हक छ हामी कहाँ ? हाम्रो पार्टीनै हो महिलाहरुको प्रतिनिधित्वलाई समानुपातिक बनाउन निरन्तर लाग्ने हाम्रो पार्टी नै हो ।’

त्यस्तै सांसद अधिकारीले महिलाहरुसँग क्षमता भएकाले उनीहरुलाई प्रतिनिधिसभाको प्रत्यक्षतर्फ उम्मेदवारी बढाउने कुरामा आफ्नो पार्टी प्रतिबद्ध रहेको पनि बताए ।

सम्बन्धित खबर

प्रतिक्रिया दिनुहोस

Back to top button